Poesie di Paolo Gibertini

Un Mond c’al cambia

L’è un mònd cl’è drée a finir
acsé, tòtt in d’na vòlta.
Gh’arom un bèl da dir
e‘t ricordet ed na vòlta?

A ghiven al mond in sacca
tòtt quant; bési, salòt e comèd
e pòc pinser per ch’ieter
e per tòtt coll cl’era scomèd.

In gnanch un mèis apèina
som chè col cul per téra,
schisé da la gran pèina
d’en saveir piò ch’se fèr.

L’andrà tòtt bein as disen
mo san mia quand e come,
e intant l’è seimper pès
e an capòm mia in do andòm.

Purtrop tornom indrée
e per nueter anzian
a srà un po’ torner ragas
quand gh’iven gnint a man.

Quand in fameia con pòc
as fèva tòtt listess,
e tòtt sembreven uguèl,
mia invece come adèss.

Per i me fiò e i’anvod
la srà dura soporter
ed cateres con al man vòdi
e doveir ricomincer.

Mo almeno s’an ghè eter
e sran tòtt un po’ piò uguèl,
e i’un insèm a chieter
pran fèr un mond normèl.

L’andrà tòtt bein l’è veira,
anca se mia per tòtt.
E intant l’è primavera,
Forza e Curagg a Tòtt.

Paolo Gibertini 21/3/2020

Un Mondo che cambia

E’ un mondo che sta finendo
così, tutto in una volta.
E avremo un bel da dirci
ti ricordi di una volta ?

Avevamo il mondo in tasca
tutti quanti; soldi, salute e agi
e pochi pensieri per gli altri
e per tutto ciò che è scomodo.

In neanche un mese appena
siam qui col cul per terra,
schiacciati dalla pena
di non saper più che fare.

Andrà tutto bene ci dicono,
ma non sanno quando e come;
e intanto è sempre peggio
e non capiamo dove andiamo.

Purtroppo andiamo indietro,
e per noialtri anziani
sarà un po’ tornar ragazzi,
quando non avevamo niente a mano.

Quando in famiglia con poco
si faceva tutto lo stesso,
e tutti sembravano uguali,
non invece come adesso.

Per i miei figli e nipoti
sarà dura sopportare
di trovarsi a mani vuote
e dover ricominciare.

Ma almeno se non altro
saran tutti un po’ più uguali,
e gli uni insieme agli altri,
potran fare un mondo normale.

Andrà tutto bene, è vero,
anche se non per tutti.
E intanto è primavera:
Forza e Coraggio a Tutti !